बिजुली काटिएका उद्योगहरूले विद्युत महसुलको पहिलो किस्ता बुझाउन थाले

वीरगञ्ज । लामो समयदेखि विद्युत महसुल तिर्न अस्वीकार गर्दै आएका वीरगञ्जसहितका केही उद्योगहरूले अखेर पहिलो किस्ता बुझाएका छन्। नेपाल विद्युत प्राधिकरणका अनुसार, लाइन काटिएका २५ मध्ये हालसम्म २१ वटा उद्योगले महसुलको पहिलो किस्ता तिरेका छन्।

प्राधिकरणका अनुसार ती उद्योगहरूको कुल बक्यौता चार अर्ब ९४ करोड ३० लाख रुपैयाँ रहेकोमा पहिलो किस्ताबापत १७ करोड ४६ लाख रुपैयाँ भुक्तानी भएको छ। तीमध्ये सबैभन्दा बढी रकम जगदम्बा स्टिल कम्पनीले बुझाएको हो। कम्पनीले हिजो मात्रै पाँच करोड ७२ लाख रुपैयाँ तिरेको प्राधिकरणले जनाएको छ।

त्यसैगरी रिलायन्स स्पिनिङ मिल्स, शिवम् सिमेन्ट, घोराही सिमेन्ट, अर्घाखाँची सिमेन्ट लगायतका उद्योगहरूले पनि पहिलो किस्ता बुझाएका छन्।

विद्युत महसुल भुक्तानीलाई सहज बनाउन प्राधिकरणले उद्योगीहरूलाई किस्ताबन्दी सुविधा उपलब्ध गराएको थियो। सोही योजनाअनुसार उद्योगहरूले बाँकी रकम किस्ताबन्दीमार्फत तिर्ने सहमति जनाएका छन्।

प्राधिकरणका अनुसार, महसुल असुली प्रक्रिया पारदर्शी र प्रभावकारी बनाउन उद्योग क्षेत्रसँग निरन्तर समन्वय भइरहेको छ।
बक्यौता असुलीमा देखिएको सकारात्मक प्रगतिप्रति सन्तोष व्यक्त गर्दै प्राधिकरणले बाँकी उद्योगहरूलाई पनि तत्काल भुक्तानी प्रक्रिया अघि बढाउन आग्रह गरेको छ।

नेपाल विद्युत प्राधिकरणले बक्यौता असुली अभियानलाई तीव्र बनाउने तयारी गरेको छ र आउँदो महिनाभित्र दोस्रो किस्ता तिर्ने समयसीमा तोकेको छ।