वीरगञ्जमा हैजा नियन्त्रणका लागि ‘एकद्वार नीति’ लागू, औषधि वितरणमा सतर्कता

वीरगञ्ज।  वीरगञ्जमा हैजा नियन्त्रणलाई प्रभावकारी बनाउन महानगर प्रमुख राजेशमान सिंहले प्रभावित क्षेत्रमा औषधि तथा सामग्री वितरण एकद्वार नीतिबाट मात्र गर्न निर्देशन दिएका छन् । उनले हैजालाई हौवा बनाएर व्यापार नगर्न सबै पक्षलाई आग्रहसमेत गरे ।

निजी अस्पतालहरूले परीक्षणका नाममा किट बिक्री गर्ने प्रयास देखिएको भन्दै प्रमुख सिंहले सरकारले नै किट निशुल्क उपलब्ध गराउने स्पष्ट पारे ।

महानगरमा आयोजित अन्तरक्रियात्मक छलफलमा स्वास्थ्य मन्त्रालय, विश्व स्वास्थ्य संगठन (WHO), युनिसेफ, प्रदेश स्वास्थ्य निर्देशनालय र महानगर स्वास्थ्य शाखाका प्रतिनिधिहरूसँग विचारविमर्श गर्दै सिंहले हैजा नियन्त्रणका सबै कार्यलाई एकीकृत ढंगले अघि बढाउनुपर्नेमा जोड दिए ।

छलफलमा स्वास्थ्य मन्त्रालयका जनस्वास्थ्य प्रशासक विशाल सुवेदीले उपचारका लागि सरकारी स्वास्थ्य संस्थालाई नै केन्द्र बनाउनुपर्ने बताए । उनले निजी स्वास्थ्य संस्थाले पनि झाडापखाला सम्बन्धी रोगको उपचारमा समान मापदण्ड अपनाउनुपर्ने धारणा राखे । मन्त्रालयको टोलीले महानगरको समन्वयमा निजी अस्पतालहरूको अनुगमन गर्ने र आइसियुमा उपचाररत बिरामीहरूको अवस्थाबारे प्रत्यक्ष जानकारी लिने तयारी भएको जानकारी दिइयो ।

यस्तै, स्वास्थ्य सेवा विभागका सरुवा रोग शाखा प्रमुख डा. प्रविण झाले एकपटक हैजाको पुष्टि भएपछि त्यस्तै लक्षण भएका सबै बिरामीको पुनः परीक्षण आवश्यक नहुने स्पष्ट पारे । “बारम्बार परीक्षण गर्नुभन्दा सीधा उपचारमा ध्यान दिनुपर्छ,” भन्दै उनले स्वास्थ्यकर्मीलाई उपचारलाई प्राथमिकता दिन आग्रह गरे ।

यसबीच, स्वास्थ्य मन्त्री प्रदीप पौडेल आज दिउँसो वीरगञ्ज आउने कार्यक्रम रहेको छ । उनी दिउँसो २ बजे नारायणी अस्पताल पुगेर अवलोकन गर्ने र त्यसपछि महानगर तथा सरोकारवालासँग हैजा नियन्त्रणबारे छलफल गर्ने तय गरिएको छ ।

स्वास्थ्य मन्त्रालय र विभागको उच्चस्तरीय टोली हिजोदेखि नै वीरगञ्जमा खटिएको छ र हैजा नियन्त्रण तथा उपचार गतिविधि नजिकबाट अनुगमन गरिरहेको छ ।