वीरगंज ९ जेठ –आगामी आर्थिक वर्ष २०८२/०८३ को बजेट लेखनको अन्तिम चरणमा अर्थ मन्त्रालय जुटेको छ। देशको आवश्यकता, जनअपेक्षा, उपलब्ध स्रोत र प्राप्त सुझावहरूलाई समेट्दै बजेट तयार पारिने अर्थ मन्त्रालयले जनाएको छ।
अर्थ मन्त्रालयका प्रवक्ता श्यामप्रसाद भण्डारीका अनुसार, बजेट लेखनको प्रक्रिया सुझाव र परामर्शमा आधारित भएर अघि बढाइएको छ। उपप्रधानमन्त्री एवं अर्थमन्त्री विष्णुप्रसाद पौडेल र उहाँको टोली बजेट निर्माणमा पूर्ण रूपमा केन्द्रित रहेको जनाइएको छ।
अर्थ मन्त्रालयले बजेट निर्माणका क्रममा संबद्ध मन्त्रालय, विभाग, राष्ट्रिय योजना आयोग, राजनीतिक दल, जनप्रतिनिधि, तथा विषयगत विज्ञहरूसँग परामर्श गरिसकेको छ।
अर्थमन्त्री पौडेलले नेपाली कांग्रेस सभापति शेरबहादुर देउवा, माओवादी केन्द्र अध्यक्ष पुष्पकमल दाहाल ‘प्रचण्ड’ लगायतका शीर्ष नेताहरूसँग परामर्श गरेका थिए। साथै, पूर्व अर्थमन्त्री, पूर्व अर्थसचिव, अर्थविद्हरू, नेपाल उद्योग वाणिज्य महासङ्घ, नेपाल उद्योग परिसङ्घ, नेपाल चेम्बर अफ कमर्स लगायतका संघसंस्थासँग पनि छलफल गरिएको अर्थमन्त्रीको सचिवालयले जनाएको छ।
बजेट निर्माणमा जनसहभागिता बढाउने उद्देश्यले अर्थ मन्त्रालयले सार्वजनिक रूपमा सुझाव आह्वान गरेको थियो। नागरिक, संघसंस्थाका पदाधिकारी र जनप्रतिनिधिहरूले पनि बजेटबारे सुझाव दिएका छन्। विकास साझेदारहरूसँग पनि छलफल भएको मन्त्रालयले जनाएको छ।
सरकारको नीति तथा कार्यक्रम र बजेटका सिद्धान्त तथा प्राथमिकताबारे संसदमा छलफल सम्पन्न भइसकेको छ। मन्त्रालयका अनुसार बजेटमा अर्थतन्त्र सुधार, रोजगारी सिर्जना, डिजिटल अर्थतन्त्र, भौतिक पूर्वाधार, सामाजिक सुरक्षा आदि क्षेत्रहरू प्राथमिकतामा राखिनेछ।
आगामी कार्यतालिका अनुसार:
जेठ १४ गते: आर्थिक सर्वेक्षण संसदमा प्रस्तुत गरिनेछ
जेठ १५ गते: बजेट वक्तव्य संसदमा पेश गरिनेछ
यो वेवसाइट दिशा निर्देश डट कमको आधिकारिक न्यूज पोर्टल हो । नेपाली भाषाको यो पोर्टलले समाचार, विचार, मनोरञ्जन, खेल, विश्व, सुचना प्रविधि, भिडियो तथा जीवनका विभिन्न आयामका समाचार र विश्लेषणलाई यसले समेट्छ।
कम्पनी दर्ता नं : २४७८४८/०७७/७८
सुचना विभाग दर्ता नं : २८२४-२०७८/८९
दिशा निर्देश 
