काठमाडौं । प्रमुख प्रतिपक्षी नेकपा (माओवादी केन्द्र)ले लिपुलेकमार्ग भएर भारत र चीनबीच भएको पछिल्लो व्यापारिक सम्झौताप्रति आपत्ति जनाउँदै नेपाल सरकारलाई आवश्यक कूटनीतिक पहल गर्न आग्रह गरेको छ।
प्रतिनिधिसभाको बिहीबारको बैठकमा आकस्मिक समय लिएर माओवादी केन्द्रका प्रमुख सचेतक हितराज पाण्डेले नेपाललाई जानकारी नै नदिई गरिएको सम्झौता राष्ट्रिय सार्वभौमिकता र अखण्डतामाथिको चुनौती भएको बताएका थिए।
‘नेपाललाई जानकारी नदिई गरिएको भनिएको सहमति प्रति आपत्ति प्रकट गर्दछौँ, विरोध गर्दछौँ,’ पाण्डेले भने, ‘राष्ट्रिय सार्वभौमिकता र अखण्डताको रक्षाका लागि सरकारले दह्रोसँग उभिएर दुवै छिमेकी मुलुकसँग प्रभावकारी कूटनीतिक र राजनीतिक पहल गर्नुपर्छ।’
माओवादी केन्द्रले उक्त विषयमा सदनलाई आवश्यक जानकारी गराउन सरकारसँग माग गरेको छ। साथै, सार्वभौमिकताको रक्षा र राष्ट्रिय हितको पक्षमा सबै दल र जनतालाई एकजुट हुन पनि आह्वान गरेको छ।
‘यस अवस्थामा राष्ट्रिय एकतालाई सबल पार्दै नेपालको सार्वभौमिकता तथा अखण्डताको रक्षा र हितमा एकजुट हुन आम जनतालाई हाम्रो दलको तर्फबाट हार्दिक अनुरोध गर्दछौँ,’ पाण्डेले सभामुखमार्फत भने।
यो वेवसाइट दिशा निर्देश डट कमको आधिकारिक न्यूज पोर्टल हो । नेपाली भाषाको यो पोर्टलले समाचार, विचार, मनोरञ्जन, खेल, विश्व, सुचना प्रविधि, भिडियो तथा जीवनका विभिन्न आयामका समाचार र विश्लेषणलाई यसले समेट्छ।
कम्पनी दर्ता नं : २४७८४८/०७७/७८
सुचना विभाग दर्ता नं : २८२४-२०७८/८९
दिशा निर्देश 
