वीरगञ्ज – मिटरब्याजी साहुकारविरुद्ध पर्सामा मंगलबारसम्म ८३ उजुरी परेको छ ।
चर्को मिटर ब्याजको समस्याले पीडित नागरिकले ८३ जना मिटरब्याजी साहुकारविरुद्ध जिल्ला प्रशासन कार्यालय पर्सामा उजुरी गरेका हुन् ।
मिटर ब्याजीहरूका कारण कतिपयले घरबार गुमाएको त कतिपयले परिवार नै विथोलिएको भन्दै उजुरी गरेको बुझिएको छ ।
मिटर ब्याज साहुकारका कारण सोझासिधा नागरिक समस्यामा परेको भन्दै उनीहरुलाई कारबाही गर्न सरकारले उजुरी आह्वान गरेको थियो ।
यस अघि भदौ ५ गतेसम्म उजुरी दिने समय दिएको भए पनि सरकारले अहिले समय खुला गरेर मिटर ब्याजीबारेका निवेदन र कारबाहीलाई निरन्तरता दिन जिल्ला प्रशासन कार्यालयलाई परिपत्र नै जारी गरेको छ ।
त्यही आधारमा अहिले मिटरब्याजी साहुकारविरुद्धका निवेदन लिने काम जारी नै रहेको पर्साका सहायक प्रमुख जिल्ला अधिकारी भिमकान्त पौडेल बताउँछन् ।
‘हामीले निवेदन लिएर गृहमन्त्रालय पठाउँछौँ,’ उनले भने, ‘थप कारबाही र अनुसन्धान मन्त्रालय मातहतको प्रहरीले गर्ने गरेको छ ।’
पर्सा जिल्लामा पनि मिटर ब्याजीहरुको ठूलै गिरोह रहेको देखिएको र मंगलबारसम्म ८३ जना साहुकारविरुद्ध उजुरी परेको उनले बताए ।
मिटर ब्याजीहरूका कारण समस्यामा परेकाहरूको बारेमा अध्ययन गर्न गृहमन्त्रालयले सहसचिव डा.भिष्मकुमार भुसालको संयोजकत्वमा कार्यदल गठन गरेपछि कार्यदलले साहुकारविरुद्ध उजुरी दिन आह्वान गरेको थियो ।
त्यही अनुसार देशैभरबाट उजुरी आउने क्रम चलिरहेको र पर्सा जिल्लामा पनि त्यो क्रम जारी रहेको हो ।
यो वेवसाइट दिशा निर्देश डट कमको आधिकारिक न्यूज पोर्टल हो । नेपाली भाषाको यो पोर्टलले समाचार, विचार, मनोरञ्जन, खेल, विश्व, सुचना प्रविधि, भिडियो तथा जीवनका विभिन्न आयामका समाचार र विश्लेषणलाई यसले समेट्छ।
कम्पनी दर्ता नं : २४७८४८/०७७/७८
सुचना विभाग दर्ता नं : २८२४-२०७८/८९
दिशा निर्देश 
