वीरगञ्ज । पर्सा र बारा जिल्लाका प्रतिनिधिसभा निर्वाचन क्षेत्रहरूमा राष्ट्रिय स्वतन्त्र पार्टी (रास्वपा) ले ऐतिहासिक सफलता हासिल गर्दै आठै क्षेत्रमा क्लिन स्वीप गरेको छ । यसअघि नेपाली कांग्रेस, नेकपा एमाले तथा मधेशकेन्द्रित दलहरूको प्रभाव रहेको यी जिल्लामा रास्वपाको उदय भएको हो ।
पर्साका चारै क्षेत्रमा रास्वपाको वर्चस्व पर्सा क्षेत्र नम्बर–१ मा रास्वपाका बुद्धिप्रसाद (हरि) पन्त विजयी भएका छन् । उनले पूर्वमन्त्री प्रदीप यादवलाई १४ हजारभन्दा बढी मतान्तरले पराजित गरे । पन्तले २७ हजार २७४ मत प्राप्त गर्दा एमालेका यादवले १३ हजार ३० मत ल्याए ।
कांग्रेसका अनिल रुंगटा ११ हजार ८८५ मतसहित तेस्रो स्थानमा रहे । पर्सा क्षेत्र नम्बर–२ मा पनि रास्वपाकै सुशीलकुमार कानु निर्वाचित भए । उनले ३० हजार ७४० मत प्राप्त गर्दै पूर्वकानुनमन्त्री अजय चौरसियालाई १८ हजार ८५० मतान्तरले हराए । कांग्रेसका चौरसियाले ११ हजार ८९० मत प्राप्त गर्दा एमालेकी रीमा कुमारी यादव ११ हजार ६०५ मतसहित तेस्रो स्थानमा रहिन् ।
पर्सा क्षेत्र नम्बर–३ मा रास्वपाका रामाकान्त चौरसिया २९ हजार ६७९ मतसहित विजयी भए । उनका निकटतम प्रतिस्पर्धी कांग्रेसका सुरेन्द्रप्रसाद चौधरीले १६ हजार ३६६ मत प्राप्त गरे भने एमालेका रुपेशकुमार पाण्डे ११ हजार ९१४ मतसहित तेस्रो स्थानमा रहे ।
पर्सा क्षेत्र नम्बर–४ मा रास्वपाका टेकबहादुर शाक्य भारी मतान्तरसहित निर्वाचित भए ।
उनले २८ हजार ६ मत प्राप्त गर्दै कांग्रेसका पूर्वमन्त्री रमेश रिजाललाई १५ हजार ४७२ मतान्तरले पराजित गरे । रिजालले १२ हजार ५३४ मत ल्याउँदा एमालेका जालिम मियाँ मन्सुरीले १२ हजार १४५ मत प्राप्त गरे । नेकपाका जयप्रकाश थारुले ३ हजार ११३ मत ल्याए ।
बाराका चारै क्षेत्रमा पनि रास्वपाको क्लिन स्वीप बारा क्षेत्र नम्बर–१ मा रास्वपाका गणेश धिमाल ३९ हजार ९९८ मतसहित निर्वाचित भए ।
उनका निकटतम प्रतिस्पर्धी कांग्रेसका शम्भुबहादुर बुढाथोकीले १४ हजार २२३ मत प्राप्त गरे भने एमालेका अच्युतप्रसाद मैनालीले ११ हजार ६४५ मत पाए ।
लामो समय कांग्रेस राजनीतिमा सक्रिय धिमाल २०७९ सालमा रास्वपामा आबद्ध भएका थिए ।
बारा क्षेत्र नम्बर–२ मा रास्वपाका चन्दनकुमार सिंह भारी मतान्तरसहित विजयी भएका छन् ।
उनले ३५ हजार ५९० मत प्राप्त गर्दै जसपा नेपालका रामकिशोर प्रसाद यादवलाई २१ हजार ३९४ मतान्तरले पराजित गरे । यादवले १४ हजार १९६ मत ल्याए । कांग्रेसका भैयाराम यादवले ११ हजार ८३७ तथा एमालेका बलबिरप्रसाद चौधरीले ७ हजार २१३ मत प्राप्त गरे ।
वि.सं. २०३८ चैत २६ गते जन्मिएका सिंह देवताल गाउँपालिकाका पूर्वअध्यक्ष हुन् ।
बारा क्षेत्र नम्बर–३ मा रास्वपाका ई.अरबिन्द साह ४० हजार ६९७ मतसहित निर्वाचित भए ।
उनका निकटतम प्रतिस्पर्धी कांग्रेसका फरमुल्लाह मंसुरले १० हजार ५२ मत प्राप्त गर्दा मतान्तर ३० हजार ६४५ कायम भयो । जसपा नेपालका रामबाबुकुमार यादव ६ हजार ८८४ मतसहित तेस्रो स्थानमा रहे । एमालेकी ज्वालाकुमार साहले ५ हजार २७१ मत प्राप्त गरिन् । जनमत पार्टीका प्रमोदप्रसाद गुप्ता र नेकपाका भरतप्रसाद साहले क्रमशः ३ हजार ८१९ र १ हजार ७५१ मत ल्याए । बारा–४ मा राष्ट्रिय स्वतन्त्र पार्टी (रास्वपा)का उमेदवार रहबर अन्सारी भारी मतान्तरसहित निर्वाचित भएका छन् ।
उनले ४१ हजार २०० मत प्राप्त गर्दै निकटतम प्रतिस्पर्धी नेकपा (एमाले)का कृष्णकुमार श्रेष्ठ (किसान) लाई २९ हजार ५६४ मतको फराकिलो अन्तरले पराजित गरे । पूर्वमन्त्रीसमेत रहेका श्रेष्ठले मात्र ११ हजार ६३९ मत प्राप्त गरेका छन् । जनता समाजवादी पार्टी (जसपा) नेपालका सन्जु साह कानुले ७ हजार ८९३, नेपाली कांग्रेसका श्यामबाबु गुप्ताले ७ हजार ११३ मत प्राप्त गरेका छन् । पाँचौँ स्थानमा रहेका नेपाली कम्युनिस्ट पार्टी (नेकपा)का अजय कुशवाहाले भने २ हजार ६७ मत मात्रै पाएका छन् । रहबर अन्सारी २०७९ को प्रदेशसभा निर्वाचनमा तत्कालीन नेकपा (माओवादी केन्द्र) बाट पर्सा १ (१) मा मधेस प्रदेशको प्रदेशसभा सदस्य निर्वाचित भएका थिए । प्रतिनिधिसभा सदस्य निर्वाचन लड्नका लागि उनले प्रदेशसभा सदस्य पदबाट राजीनामा दिएका थिए ।
दिशा निर्देश 
